« Ur munud eo ar .bzh met ober a ra an diforc’h. Hon identelezh eo, hon anien. Gantañ ne c’hellomp ket ankouaat eus pelec’h e teuomp. » Jorge Gonzales, Roazhon Rugbi Klub
Rec Rugbi Roazhon, klub breizhat e Rann gevreadel 1 : ouzhpenn 50 bloavezh a entan rugbi !
Gellout a rit en em ginnig ha deskrivañ hoc’h obererezh ?
Jorge Gonzales eo ma anv, c’hoarier rugbi a vicher on bet e-pad 15 vloaz. Kroget e oan ganti en Arc’hantina, neuze en Italia a-raok degouezhout e Frañs. Degouezhet on er REC 4 bloaz zo gant daou bal : echuiñ ma red-micher evel c’hoarier, ha kregiñ d’ober war-dro kevelerien liesseurt ar c’hlub. Abaoe warlene on paouezet gant ma red-micher evel c’hoarier. Klask a ran kevelerien nevez ha buheziñ a ran klub ar gevelerien. Ober a ran war-dro ambroug ar c’hoarierien ivez : ar strollad karbedoù ha degemer ar c’hoarierien nevez.
Kenderc’hel a ra ar c’hlub da vont war-raok. Pignet e oa eus ur rann daou vloaz zo : eus ar rann gevreadel 2 d’ar rann gevreadel 1. Ur raktres uhelek zo gant ar c’hlub. Ar bloaz-mañ e fell deomp c’hoari evit pignat er rann vroadel. Ur c’hlub studierien e oa er penn-kentañ. Abaoe m’eo degouezhet ar prezidant nevez, Jean-Marc Trihan, eo bet frammet ar c’hlub da vat. Ur raktres uhelek a zo ganeomp met krog omp start en hon douar.
Abalamour d’ar C’hovid n’ez eus bet c’hoariet nemet 4 krogad gant ar c’hlub. Deroù ar c’houlzad zo bet mat ganeomp. Eilvet e oamp, gant ur c’hrogad nebeutoc’h eget ar c’hentañ. Klask a raimp adlañsañ an traoù er c’houlzad kentañ. Tutaet hon eus c’hoarierien evit pignat er rann a-us.
Ul lec’hienn internet e .BZH ho peus, perak an dibab-se ?
Sed aze un dibab hon doa graet daou pe dri c’houlzad zo. Gant ar .BZH e c’hellomp en em zieubiñ. Klask a reomp tennañ un dra bennak eus hor gwriziennoù evit ar rugbi e Breizh. Lorc’h zo ennomp o vezañ breizhat ha c’hoant hon eus bezañ ur c’hlub breizhat o sevel. Bezañ e .BZH zo un doare d’en em ziforc’hiñ. Hag en em steudañ diouzh hor c’hehentiñ ivez. Implijout a reomp kalz a luc’hskeudennoù e gwenn ha du, da skouer. Gwenn ha du eo hol livioù, Breizh eo. An digarez eo da ziskouez kement-se war unan eus hor rakstalioù pennañ : hol lec’hienn internet.
Perak eo a bouez deoc’h kehentiñ e .BZH ?
Ur munud eo ar . BZH met ober a ra an diforc’h. Reiñ a ra un identelezh deomp. Mont a ra ar c’hluboù a vicher en-dro, evit an darn vuiañ anezho, en ur mod all hag ar .BZH, poellek a-walc’h eo. Un identelezh eo, un anien. Gantañ ne c’hellomp ket ankouaat eus pelec’h e teuomp. Liessevenadurel eo ar rugbi, dont a ra hor c’hoarierien eus a bep seurt broioù ha kavout a ra din eo kaer-meurbet, er sport, gellout bodañ kement, met ne ankouaomp ket omp Breizhiz. Hiziv eo Roazhon an eilvet klub e Breizh a-fet live sport. Sell ar renerien zo pignat en ur vezañ breizhat. A bouez eo kehentiñ e .BZH.
Petra eo palioù ho lec’hienn internet ? Perak ho peus krouet unan ?
Krouet eo bet al lec’hienn internet rennes-rugby.bzh gant unan eus hor c’hevelerien, Pierre Cheminant (Versio). E meur a zoare eo a bouez deomp kaout ul lec’hienn internet. Danvez e-leizh a zo enni. Labourat a reomp kalz war an doare-se. Pennadoù hir a zo, gant poltredoù pergen. Dibaot eo ar c’hluboù a labour war doare an danvez. A bouez eo an doare-se ivez evit hor sponsorien hag hon harperien.
Gant al lec’hienn e c’hellomp en em reiñ da anavezout, degas danvez d’hon harperien. Implijout a reomp anezhi evel ur rakstal. Ne c’heller ket mont en-dro anez lec’hienn internet hiziv. Ne c’heller ket tremen gant bezañ war ar rouedadoù sokial ha tra ken.